२०२६ सम्म चाँदी २०० डलर प्रति औंस पुग्नेछ: रोबर्ट कियोसाकीको भविष्यवाणी भाइरल

काठमाण्डौ । 'रिच ड्याड पुअर ड्याड'का लेखक तथा लगानी गुरु रोबर्ट कियोसाकीले सुन, चाँदी र बिटक्वाइनको मूल्य उतारचढावलाई बेवास्ता गर्दै यी सम्पत्तिमा निरन्तर लगानी बढाउनुपर्ने सल्लाह दिएका छन्। उनको यो भनाइ सामाजिक सञ्जाल X मा निकै भाइरल भएको छ।

कियोसाकीले आफ्नो हालैको पोस्टमा प्रश्नोत्तर शैलीमा लेखेका छन्:

-प्रश्न: सुन, चाँदी वा बिटक्वाइनको मूल्य बढ्दा वा घट्दा चिन्ता लाग्छ कि लाग्दैन?

उत्तर: होइन, मलाई कुनै चिन्ता लाग्दैन।

-प्रश्न: किन चिन्ता लाग्दैन?

उत्तर: किनभने अमेरिकाको राष्ट्रिय ऋण निरन्तर बढिरहेको छ र अमेरिकी डलरको क्रयशक्ति घट्दै गएको छ।

उनले थपेका छन्, "चिन्ता किन गर्ने? म त थप सुन, चाँदी, बिटक्वाइन र इथेरियम किनिरहन्छु र यसैले अमीर हुँदै गएको छु।" उनले अमेरिकी फेडरल रिजर्भ, ट्रेजरी र सरकारलाई 'अक्षम तथा उच्च शिक्षित पीएचडीहरू'ले चलाइरहेको भन्दै व्यंग्यसमेत गरेका छन्।

कियोसाकीले विशेष गरी चाँदीको ठूलो भविष्यवाणी गरेका छन्। उनको अनुमानअनुसार २०२६ सम्ममा चाँदीको मूल्य २०० डलर प्रति औंस पुग्नेछ। हाल चाँदीको मूल्य ९० डलरभन्दा माथि (केही रिपोर्टमा १०० डलर नजिक) पुगिसकेको छ र यो बढ्दै गएको छ।

यो पोस्टले लगानीकर्ताहरूमाझ छलफल बढाएको छ। कियोसाकीले छोटो अवधिको मूल्यलाई 'हल्ला' मात्र ठानेर लामो अवधिको लागि यी 'वास्तविक सम्पत्ति'मा लगानी गर्न सुझाव दिएका छन्। उनको बारम्बार दोहोरिने सन्देश छ -'बचत गर्नेहरू हार्नेहरू हुन्।'

नेपालमा पनि सुन र चाँदीको मूल्य बढिरहेको छ। हाल सुन प्रतितोला ३ लाख ३ हजार ८०० रुपैयाँ र चाँदी प्रतितोला ६ हजार ४८० रुपैयाँ पुगिसकेको छ । यो आर्थिक अनिश्चितताको समयमा कियोसाकीको सल्लाहले धेरै नेपाली लगानीकर्तालाई पनि प्रभावित पार्नसक्ने देखिन्छ ।