देशका २६ जिल्लामा आज बाढीको जोखिम, सावधानी अपनाउन आग्रह

 

काठमाण्डौ  ।  आज देशका विभिन्न २६ जिल्लामा बाढीको जोखिम रहेको बताईएको छ । जल तथा मौसमको बाढी पूर्वानुमान महाशाखाका अनुसार काठमाण्डौ उपत्यकाका तीन जिल्लासहित  सिन्धुपाल्चोक, लमजुङ, कास्की, दाङ, बाँके, बर्दिया, कैलालीमा जोखिम रहेको छ । यस्तै काभ्रे, धादिङ, झापा, इलाम, पाँचथर, ताप्लेजुङ, तेह्रथुम, संखुवासभा, गोरखा, चितवन, तनहुँ, नवलपरासी–पश्चिम, रुपन्देही, कपिलवस्तु, कञ्चनपुर तथा  डडेलधुरा र आसपासका जिल्ला भई बहने स–साना नदीमा पनि पानीको बहाव अत्याधिक बढ्ने र आकस्मिक बाढीको  जोखिम बढ्न सक्ने सम्भावना रहेको छ । 

देशभर मनसुन सक्रिय भएसँगै  धेरै ठाउँमा पानी परेको छ । मंगलबार देखि  शुरु भएको पानी पर्नेक्रम विहीबार सम्म रहने मौसम पूर्वानुमान महाशाखाले जनाएको छ । बुधबार  दिउँसो देशभर पूर्णतया बादल लाग्ने तथा कोशी, बागमती, गण्डकी, लुम्बिनी र कर्णाली प्रदेशका पहाडी भागका एकरदुई स्थानमा भारी वर्षाको सम्भावना रहेको महाशाखाले जनाएको छ ।  

विहीबार देखि कोशी र बागमती प्रदेशलगायत देशका  पहाडी क्षेत्रका केही ठाउँमा भारी वर्षाको सम्भावना रहेको छ । पानी परि रहेका र पर्ने सम्भावना रहेका क्षेत्रमा बाढी, पहिरो, डुबान तथा सडक अवरुद्ध जस्ता जोखिम हुने भएकाले आवश्यक सर्तकता अपनाउन समेत राष्ट्रिय विपद् जोखिम न्यूनीकरण तथा व्यवस्थापन प्राधिकरणले आग्रह गरेको छ ।