बजारमा नगद परिचालन १.३३% ले बढ्यो, सरकारी कोष पनि वृद्धि

काठमाण्डौ । बजारमा नगद परिचालन १.३३ प्रतिशतले बढेको छ । नेपाल राष्ट्र बैंकले सार्वजनिक गरेको पुस महिनाको मासिक विवरणअनुसार पुस महिनासम्ममा बजारमा ७ खर्ब ६० अर्ब १० करोड रुपैयाँबराबरको नगद परिचालन भएको छ । गत असार महिनासम्ममा भने बजारमा ७ खर्ब ५० अर्ब ११ करोड रुपैयाँबराबरको नगद परिचालन भएको थियो ।  

पुस महिनासम्म केन्द्रीय बैंकमा बैंक तथा वित्तीय संस्थाहरुको निक्षेप ५ खर्ब ७० अर्ब रुपैयाँ पुगेको छ । जुन असार महिनाको तुलनामा ४६.६७ प्रतिशतले बढी हो । गत असार महिनासम्म केन्द्रीय बैंकमा बैंक तथा वित्तीय संस्थाको निक्षेप ३ खर्ब ८८ अर्ब रुपैयाँ थियो ।  

यस्तै राष्ट्र बैंकमा सरकारको निक्षेप पनि बढेको छ । गत असार महिनासम्म ७० अर्ब ८३ अर्ब रुपैयाँ सरकारी निक्षेप रहेकोमा पुससम्म बढेर ३ खर्ब ४ अर्ब पुगेको छ ।  

पुस महिनासम्म राष्ट्र बैंकमा बैंक तथा वित्तीय संस्थाले ९ अर्ब ६८ करोड रुपैयाँबराबरको विदेशी मुद्रा निक्षेप गरेका छन् ।  

यो अवधिमा राष्ट्र बैंकको कुल स्वेदेशी मुद्रा सम्पत्ति १ खर्ब ७ अर्ब रुपैयाँबराबर र कुल स्वदेशी दायित्व २३ खर्ब ८ अर्ब रुपैयाँबराबर रहेको छ ।  

यस्तै कुल विदेशी मुद्रा सम्पत्ति ३१ खर्ब २२ अर्ब र कुल विदेशी मुद्रा दायित्व ५२ अर्ब ६८ करोड रुपैयाँबराबर रहेको छ ।