अर्थमन्त्रीको उद्घोष-'पोलिसी क्याप्चरको युग सकियो, अब आउने ऐनहरू ‘रेन्ट सिकिङ’का लागि हुने छैनन्'

काठमाण्डौ । नवनियुक्त अर्थमन्त्री डा. स्वर्णिम वाग्लेले ‘पोलिसी क्याप्चरको युग सकियो, अब आउने ऐनहरू ‘रेन्ट सिकिङ’का लागि हुने छैनन्’ भन्दै ठोस सुधारको संकेत गरेका छन् ।

शुक्रबार अर्थ मन्त्रालयको पदभार ग्रहण गर्दै वाग्लेले विगतका वर्षहरूमा राजनीतिक संरक्षणमा नीतिगत भ्रष्टाचार र विशेष वर्गको नीति कब्जा (पोलिसी क्याप्चर) मौलाएको बताए । उनले स्पष्ट भने, “भ्रष्ट राजनीतिको आडमा गरिने नीतिगत भ्रष्टाचार र पोलिसी क्याप्चरको युग अब सकिएको छ । अब आउने ऐनहरू कुनै निहित स्वार्थ वा रेन्ट सिकिङ (भाडा खोज्ने) का लागि बन्ने छैनन्, बरु देश र जनताको हितमा मात्र बन्नेछन् ।”

अर्थमन्त्री वाग्लेले आगामी आर्थिक वर्षको बजेटलाई पूर्ण रूपान्तरणकारी बनाउने घोषणा गरे । उनले भने, “विगत जस्तो आर्थिक राजकाजको बजेट यसपालि आउँदैन । जेठ १५ मा आउने बजेटले आर्थिक जहाजको दिशा नै मोड्नेछ । रूपान्तरणसहितको नयाँ बजेट आउनेछ ।”

वाग्लेले राजनीति खर्चिलो बन्दा नीति, संस्था र विशिष्ट वर्गको कब्जा बढेको बताए । अब त्यस्तो अवस्था नरहने दाबी गर्दै उनले जनताले प्रत्यक्ष भोग्ने सास्ती हटाउने कामलाई सरकारको मुख्य प्राथमिकता रहेको उल्लेख गरे । “जनताले घुस खुवाउनु नपर्ने, लाइन बस्नु नपर्ने र दैनिक जीवनमा प्रत्यक्ष प्रभाव पार्ने सुधारका निर्णयहरू आजैबाट अघि बढाइनेछ,” उनले जानकारी दिए ।

मध्यपूर्वको तनावले नेपालको अर्थतन्त्रमा पर्न सक्ने अल्पकालीन, मध्यमकालीन र दीर्घकालीन असरको समाधान खोज्ने प्रतिबद्धता पनि वाग्लेले जनाए । उनले भने, “अर्थतन्त्रका केही सूचक सकारात्मक छन्, तर हामी सन्तुष्ट छैनौं । बाह्य र आन्तरिक चुनौती दुवै छन् । शिथिलताबाट बाहिर निस्कने बाटो खोजिनेछ।”

डा. स्वर्णिम वाग्ले (रास्वपाका उपसभापति तथा तनहुँ-१ बाट निर्वाचित) बालेन शाह नेतृत्वको सरकारमा अर्थमन्त्रीका रूपमा नियुक्त भएका हुन् । उनको यो अभिव्यक्तिले नयाँ सरकारले नीति निर्माणमा निहित स्वार्थ र विशेष वर्गको प्रभाव अन्त्य गर्दै जनहितकेन्द्रित आर्थिक सुधार गर्ने संकल्प गरेको देखिन्छ ।