५१.५३% ले बढ्यो हिमालयन लघुवित्तको नाफा, कस्ता छन् अन्य सूचक ?

काठमाण्डौ । हिमालयन लघुवित्त वित्तीय संस्था लिमिटेडले चालु आवको तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ । संस्थाले आज सार्वजनिक गरेको विवरणअनुसार संस्थाले ८ करोड १० लाख रुपैयाँ खुद नाफा आर्जन गरेको छ । यो रकम अघिल्लो आवको सोही अवधिको तुलनामा ५१.५३ प्रतिशतले बढी हो । अघिल्लो आवमा संस्थाले ५ करोड ३४ लाख रुपैयाँबराबरको खुद नाफा आर्जन गरेको थियो ।

यस्तै समीक्षा अवधिसम्म संस्थाको खुद ब्याज आम्दानी पनि बढेको छ । संस्थाको खुद ब्याज आम्दानी ३०.२३ प्रतिशतले बढ्दै ३१ करोड ८६ लाख रुपैयाँ पुगेको छ । यो अवधिसम्म संस्थाले खुद शुल्क तथा कमिशन आम्दानीमार्फत ३ करोड २६ लाख रुपैयाँ आर्जन गरेको छ । संस्थाको खुद सञ्चालन आम्दानी ३२ करोड ३ लाख रुपैयाँ रहेको छ । जुन अघिल्लो आवको सोही अवधिमा २८ करोड २८ लाखमा सीमित थियो ।  

यो अवधिमा संस्थाले इम्पेयरमेन्ट चार्जका लागि ३ करोड ३७ लाख रुपैयाँ छुट्टाएको छ । अघिल्लो आवको तेस्रो त्रैमाससम्म संस्थाले रिभर्सल चार्जका लागि ६८ लाख २२ हजार रुपैयाँ छुट्टाएको थियो ।  

अघिल्लो आवमा ३ करोड ८६ लाख रहेको संस्थाको रिटेन्ड अर्निङ ५ करोड ७५ लाख रुपैयाँ पुगेको छ । यस्तै रिजर्भको आकार १२ करोड ३९ लाखबाट बढेर १६ करोड २९ लाख रुपैयाँ पुगेको छ । संस्थाले सेयर प्रिमियम शीर्षकमा ४ करोड ५५ लाख छुट्टाएको छ ।  

ग्राहकहरुबाट १ अर्ब २२ करोड रुपैयाँ निक्षेप संकलन गरेको संस्थाले ५ अर्ब १ करोड रुपैयाँ कर्जा प्रवाह गरेको छ । संस्थाको खराब कर्जा अनुपात ५.३४ प्रतिशतबाट बढेर १०.०४ प्रतिशत पुगेको छ । संस्थाको वितरणयोग्य मुनाफा ५ करोड ७५ लाख रुपैयाँ रहेको छ । यस्तै लाभांश क्षमता २०.९१ प्रतिशत रहेको छ ।

समीक्षा अवधिसम्म संस्थाको प्रतिसेयर आम्दानी(ईपीएस)३१.६८ रुपैयाँ,मूल्य आम्दानी अनुपात २९.२० गुणा,प्रतिसेयर नेटवर्थ १५०.७६ रुपैयाँ,प्रतिसेयर कुल सम्पत्तिको मूल्य १६८६.०६ रुपैयाँ र तरलता अनुपात १३.३६ गुणा कायम भएको छ ।