इन्धन बचतका लागि हप्तामा दुई दिन वर्क फ्रम होम लागू गर्ने दिल्ली सरकारको योजना

काठमाण्डौ । दिल्ली सरकारले पेट्रोल र डिजेलको खपत घटाउने उद्देश्यले सरकारी तथा निजी क्षेत्रका लागि हप्तामा दुई दिन वर्क फ्रम होम लागू गर्ने योजना अघि सारेको छ।

मुख्यमन्त्री रेखा गुप्ताले बिहीबार आयोजित पत्रकार सम्मेलनमा यो सम्बन्धी विभिन्न योजनाहरू सार्वजनिक गरेकी हुन्। उनले ‘मेरा भारत मेरा योगदान’ नामक जनअभियान सञ्चालन गरिने जानकारी दिँदै इन्धन बचतलाई प्रमुख लक्ष्य बनाइएको बताइन्।

मुख्यमन्त्रीका अनुसार, सरकारी कार्यालयहरूमा प्रत्येक हप्ता दुई दिन वर्क फ्रम होम लागू गरिनेछ। साथै, निजी क्षेत्रका कम्पनीहरूलाई पनि सम्भव भएसम्म हप्तामा दुई दिन घरबाट काम गर्ने व्यवस्था गर्न आग्रह गरिनेछ। यो व्यवस्था अनिवार्य नभई सिफारिस स्वरूप हुनेछ र श्रम विभागले यसको अनुगमन गर्ने बताइएको छ।

त्यसैगरी, विश्वविद्यालयहरूलाई पनि सम्भव हुने अवस्थामा अनलाइन माध्यमबाट अध्ययन–अध्यापन सञ्चालन गर्न सुझाव दिइएको छ। अदालतहरूलाई समेत अधिकतम सुनुवाइ अनलाइन माध्यमबाट गर्न आग्रह गरिएको छ।

यसका साथै, दिल्ली सरकारले आगामी एक वर्षका लागि आफ्ना मन्त्री तथा उच्च अधिकारीहरूको विदेश भ्रमणमा रोक लगाउने निर्णय पनि गरेको छ।