हाइड्रोपावर कम्पनीहरुको नाफामा उछाल, विद्युत बिक्रीमार्फत रु.४० अर्ब आम्दानी

काठमाण्डौ । हाइड्रोपावर कम्पनीहरुको नाफामा उछाल आएको छ । चालु आवको तेस्रो त्रैमाससम्म हाइड्रो कम्पनीहरुले ओभरलमा ७ अर्ब ९२ करोड ९३ लाख रुपैयाँ नाफा कमाएका छन् ।  

हाइड्रो कम्पनीहरुको यो नाफा गत आवको सोही अवधिसम्मको तुलनामा ३७३.५८ प्रतिशत बढी हो । गत आवको तेस्रो त्रैमाससम्म हाइड्रो कम्पनीहरुले समग्रमा २ अर्ब ३४ करोड ८९ लाख रुपैयाँ नाफा कमाएका थिए ।  

बैंकहरुको ब्याजदर निरन्तर घटेपछि हाइड्रो कम्पनीहरुको नाफामा उल्लेख्य वृद्धि देखिएको हो । बैंक तथा वित्तीय संस्थाको ब्याजदर घट्न थालेपछि हाइड्रो कम्पनीहरुको लागत घटेपछि नाफा वृद्धिमा टेवा पुगेको हो ।  

साथै केही कम्पनीहरुको विद्युत बिक्री आम्दानी र बीमा दाबीको रकम प्राप्त हुँदा पनि नाफा बढेको देखिएको छ । विशेषगरी ब्याजदर घट्दा लागत कम भई आयोजनाको नाफामा सुधार देखिएको विज्ञहरु बताउँछन् ।  

नेप्सेमा हाल १०३ हाइड्रो कम्पनी सूचीकृत छन् । तेस्रो त्रैमासिक वित्तीय विवरण प्रकाशित गरेका १०१ कम्पनीमध्ये ७९ कम्पनी नाफामा छन् भने २२ कम्पनी भने अझै घाटामा नै छन् ।  

नाफामा रहेका ७९ हाइड्रो कम्पनीले मात्रै तेस्रो त्रैमाससम्म ९ अर्ब ९५ करोड ५४ लाख रुपैयाँ नाफा कमाएका छन् । घाटा ब्यहोरेका २२ कम्पनीको घाटा कुल नाफामा कटौती गर्दा समग्रमा हाइड्रोपावरहरुको नाफा करिब ७ अर्ब पुगेको हो ।  

सबैभन्दा बढी नाफा कमाउनेमा साहज उर्जा रहेको छ । यो कम्पनीले मात्रै तेस्रो त्रैमाससम्म १ अर्ब १८ करोड रुपैयाँ नाफा कमाएको छ । कम्पनीको यो न ाफा गत आवको तुलनामा ३०.७१ प्रतिशत बढी हो ।  

साथै सो अवधिसम्म घाटा ब्यहोर्ने २२ कम्पनीले तेस्रो त्रैमाससम्म कुल २ अर्ब २ करोड ६० लाख रुपैयाँ घाटा ब्यहोरेका छन् । सबैभन्दा धेरै रसुवागढी हाइड्रोपावरले १ अर्ब २३ करोड ९६ लाख रुपैयाँ घाटा ब्यहोरेको छ ।  

हाइड्रो कम्पनीहरुको विद्युत बिक्री आम्दानी समेत ३८.५६ प्रतिशतले बढेको छ । चालु आवको तेस्रो त्रैमाससम्म हाइड्रो कम्पनीहरुले विद्युत बिक्री गरेर कुल ४० अर्ब ६९ करोड ७० लाख रुपैयाँ आम्दानी गरेका छन् । गत आवको सोही अवधिसम्म भने हाइड्रो कम्पनीहरुले विद्युत बिक्री गरेर २९ अर्ब ३७ करोड ८ लाख रुपैयाँ आम्दानी गरेका थिए ।  

सबैभन्दा बढी अप्पर तामाकोशी हाइड्रोले बिजुली बेचेर ७ अर्ब ७१ करोड ८१ लाख रुपैयाँ आम्दानी गरेको छ । यो आम्दानी गत आवको तुलनामा ८०.७२ प्रतिशत बढी हो ।