(2).gif)
.png)
काठमाण्डौं । डोलप्रसाद अर्यालले विपक्षी दलहरूको अवरोधका बीच प्रतिनिधिसभा बैठक अघि बढाएपछि संसदमा राजनीतिक तानातान चर्किएको छ ।
प्रधानमन्त्रीसँगको अनिवार्य प्रश्नोत्तर कार्यक्रम कार्यान्वयन नभएको भन्दै विपक्षी सांसदहरूले बैठक अवरुद्ध गर्न खोजे पनि सभामुखले कार्यसूची रोकेनन् ।
प्रतिनिधिसभा नियमावलीमा प्रत्येक महिनाको पहिलो साता प्रधानमन्त्रीसँग प्रश्नोत्तर हुनुपर्ने व्यवस्था रहेपनि लामो समयदेखि कार्यक्रम सञ्चालन हुन नसकेको विषयलाई लिएर विपक्षी दलहरू आक्रोशित बनेका छन् ।
उनीहरूले प्रधानमन्त्री बालेन्द्र शाह लाई संसदमा उपस्थित गराएर प्रत्यक्ष जवाफदेही बनाउनुपर्ने माग गरेका थिए ।
तर, सभामुख अर्यालले प्रधानमन्त्रीको समय तय भएपछि जानकारी गराइने भन्दै बैठकलाई नियमित कार्यसूचीतर्फ लगेका थिए ।
विपक्षी सांसदहरू उभिएर विरोध गरिरहेकै अवस्थामा पर्यटन विधेयकमाथिको छलफल शुरु भएपछि संसदको वातावरण थप तनावपूर्ण बनेको थियो ।
त्यसक्रममा जगदीश खरेलले संसदको अवस्थालाई “तमासा” भनेपछि सत्ता र प्रतिपक्षबीच तीव्र भनाभन भएको थियो ।
नरेन्द्रकुमार केरूङ लगायतका सांसदहरूले आपत्ति जनाउँदै चर्को प्रतिक्रिया दिएका थिए ।
स्थिति नियन्त्रणबाहिर जान थालेपछि सभामुखले बैठक १५ मिनेटका लागि स्थगित गरेका थिए ।
संसदमा प्रधानमन्त्रीको अनुपस्थिति, नियमावली कार्यान्वयनको प्रश्न र सभामुखको भूमिकालाई लिएर पछिल्लो समय राजनीतिक दबाब बढ्दै गएको छ ।
विपक्षी दलहरूले संसदलाई प्रभावकारी बनाउनेभन्दा सरकार जोगाउने शैलीमा बैठक सञ्चालन भइरहेको आरोप लगाएका छन् ।
.png)
.jpg)
