संसदमा नयाँ विवाद : फोटो खिचेको निहुँमा सांसदलाई बैठक कक्षबाट लसगयो बाहिर

काठमाण्डौं । सभामुख डोलप्रसाद अर्यालको स्पष्ट आदेशबिनै प्रतिनिधिसभा बैठक कक्षमा मर्यादापालक सक्रिय भएपछि संसदभित्र नयाँ विवाद उत्पन्न भएको छ ।  

गीताकुमारी सेन्दाङलाई बैठकको फोटो तथा भिडिओ खिचेको भन्दै मर्यादापालकहरूले बाहिर लगेर सामग्री डिलिट गर्न लगाएको घटना सार्वजनिक भएको हो ।

सांसद सेन्दाङले आफूलाई बैठक कक्षमा फोटो खिच्न निषेध रहेको जानकारी नभएको बताउँदै मर्यादापालकले बाहिर लगेर भिडिओ हटाउन आग्रह गरेपछि आफूले डिलिट गरेको बताएकी छन् ।  

त्यसपछि उनी पुनः बैठकमा फर्किएकी थिइन् ।

प्रतिनिधिसभा बैठकभित्र फोटो वा भिडिओ खिच्न नपाइने व्यवस्था भएपनि सांसदलाई बैठक कक्षबाट बाहिर निकाल्ने अधिकार सभामुखको आदेशपछि मात्रै प्रयोग गर्न मिल्ने संसदीय व्यवस्था छ ।  

तर, यस घटनामा सभामुखले औपचारिक रूपमा कुनै रुलिङ गरेको अभिलेख नरहेको बताइएको छ ।

प्रतिनिधिसभा नियमावलीको नियम ३१ अनुसार सभामुखले सांसदलाई पहिला सचेत गराउने र निर्देशन नमानेको अवस्थामा मात्रै मर्यादापालक परिचालन गर्न सक्ने प्रावधान छ । 

यही कारण घटनाले मर्यादापालकको अधिकार सीमामाथि प्रश्न उठाएको छ ।

यद्यपि संसद सचिवालयका महासचिव पद्मप्रसाद पाण्डेयले भने मर्यादापालकहरू सभामुखसँग समन्वय गरेरै परिचालित भएको दाबी गरेका छन् ।  

उनका अनुसार बैठकको गतिविधि रेकर्ड गरिएको जानकारी पाएपछि भिडिओ हटाउन लगाइएको थियो ।

घटनापछि संसदभित्र सांसदको आचरण, बैठक कक्षको अनुशासन र मर्यादापालकको भूमिकाबारे नयाँ बहस शुरु भएको छ ।  

केही सांसदहरूले यसलाई संसदीय अधिकार र मर्यादाको सीमारेखासँग जोडेर पनि हेर्न थालेका छन् ।