रास्वपाले विद्युतीय मतदान प्रणाली अपनाउने, विदेशमा रहेका प्रतिनिधि समेत सहभागी हुनसक्ने

काठमाण्डौ । राष्ट्रिय स्वतन्त्र पार्टी (रास्वपा) ले नेतृत्व चयन प्रक्रियालाई थप आधुनिक, छिटो र व्यवस्थित बनाउन विद्युतीय मतदान (ई–भोटिङ) प्रणाली प्रयोग गर्ने तयारी गरेको छ। पार्टीले पहिलोपटक नेतृत्व चयनका लागि इलेक्ट्रोनिक मतदान प्रणाली अपनाउन लागेको हो।

पार्टीका प्रवक्ता मनिष झा का अनुसार मतदानका लागि रामलक्ष्मण कम्पनीद्वारा विकसित विद्युतीय भोटिङ मेसिन प्रयोग गरिनेछ। उक्त प्रणाली प्रयोगका लागि कम्पनीलाई २५ लाख रुपैयाँ भुक्तानी गरिसकिएको उनले जानकारी दिए। नेपालमै विकसित यो प्रविधि यसअघि पनि विभिन्न संस्थागत तथा राजनीतिक निर्वाचनमा प्रयोग हुँदै आएको बताइएको छ।

रास्वपाले विदेशमा रहेका प्रतिनिधिहरूलाई समेत मतदानमा सहभागी गराउने व्यवस्था मिलाएको जनाएको छ। पार्टीका अनुसार करिब ४० देशमा रहेका प्रतिनिधिहरूले नेतृत्व चयन प्रक्रियामा आफ्नो मताधिकार प्रयोग गर्न सक्नेछन्।

विद्युतीय मतदान प्रणालीले मतगणना प्रक्रिया छिटो बनाउने, नतिजा सार्वजनिक गर्न लाग्ने समय घटाउने तथा निर्वाचनलाई थप पारदर्शी र प्रभावकारी बनाउन सहयोग पुग्ने अपेक्षा गरिएको छ।