पदाधिकारी चयनमा रास्वपाको कम मतदान, १,२८९ मत मात्र खस्यो

काठमाण्डौ । राष्ट्रिय स्वतन्त्र पार्टी (रास्वपा) को पहिलो महाधिवेशनअन्तर्गत पदाधिकारी चयनका लागि भएको दोस्रो चरणको निर्वाचनमा ३० प्रतिशतभन्दा कम मतदान भएको छ।

विद्युतीय मतदान व्यवस्थापन गरिरहेको राम–लक्ष्मण इनोभेसनका अनुसार पदाधिकारी निर्वाचनमा १,२८९ मत मात्र खसेको छ। 

रास्वपामा करिब ४,३११ महाधिवेशन प्रतिनिधि रहेको अनुमानका आधारमा ७० प्रतिशतभन्दा बढी प्रतिनिधिले मतदान नगरेको देखिएको छ।

यसअघि केन्द्रीय समिति निर्वाचनमा २,९५९ प्रतिनिधिले मतदान गरेका थिए।  

त्यसको तुलनामा पदाधिकारी निर्वाचनमा आधाभन्दा कम मत खसेको हो।

कम मतदान भएपछि केन्द्रीय निर्वाचन आयोगले मतदानको समय साढे ४ बजेदेखि साढे ५ बजेसम्म थप गरेको थियो।  

नेताहरूका अनुसार महाधिवेशन लम्बिँदा बसोबास र व्यवस्थापनमा समस्या आएपछि धेरै प्रतिनिधि फर्किएकाले मतदान कम भएको हुन सक्ने अनुमान गरिएको छ।