(2).gif)
.jpg)
.png)
काठमाण्डौ। फिफा विश्वकपको सेमिफाइनलमा इंग्ल्यान्डसँग भिड्नुअघि अर्जेन्टिनाका मुख्य प्रशिक्षक लियोनल स्कालोनीले टोलीको थकान र पछिल्लो प्रदर्शनबारे आफू चिन्तित नरहेको बताएका छन्। साविक विजेता अर्जेन्टिना लगातार दोस्रो पटक विश्वकप फाइनल पुग्ने लक्ष्यसहित बुधबार इंग्ल्यान्डविरुद्ध मैदान उत्रँदैछ।
एटलान्टामा हुने खेलको पूर्वसन्ध्यामा पत्रकारसँग कुरा गर्दै स्कालोनीले टोलीका खेलाडीप्रति पूर्ण विश्वास रहेको बताए।
‘हामी राम्रो अवस्थामा छौँ र यो खेलका लागि उत्साहित छौँ। यो विश्वकपको सेमिफाइनल हो, हाम्रो लक्ष्य अझै कायम छ। यहाँसम्म पुर्याउने खेलाडीप्रति हामी आभारी छौँ,’ उनले भने।
३९ वर्षीय कप्तान लियोनल मेस्सीको नेतृत्वमा रहेको अर्जेन्टिनाले विश्वकपको नकआउट चरणमा कठिन संघर्ष गर्दै अन्तिम चारको यात्रा तय गरेको हो। टोलीले अतिरिक्त समयसम्म पुगेका प्रतिस्पर्धात्मक खेलहरू पार गर्दै सेमिफाइनलमा स्थान बनाएको छ।
‘डेढ महिनाअघि कसैले मलाई सेमिफाइनल पुग्ने अवसर दिन्छ भने म स्वीकार गर्ने थिएँ। हामी कसरी यहाँसम्म आइपुग्यौँ भन्ने कुराले फरक पार्दैन,’ स्कालोनीले भने, ‘म मेरा खेलाडीलाई आलोचना गर्न सक्दिनँ। हामी थाकेका छौँ वा छैनौँ भन्ने अहिले महत्वपूर्ण होइन, यो विश्वकपको सेमिफाइनल हो।’
सन् २०२२ मा अर्जेन्टिनालाई विश्वकप उपाधि दिलाएका स्कालोनीले खेलाडीहरूको मानसिकता र प्रतिबद्धताप्रति प्रशंसा गरे।
(2).gif)
.gif)
(1).gif)
म्याराडोनाको सम्झनासँग जोडिएको प्रतिस्पर्धा
अर्जेन्टिना र इंग्ल्यान्डबीचको विश्वकप इतिहास निकै चर्चित छ। यी दुई टोली विश्वकपमा यसअघि पाँच पटक आमनेसामने भएका छन्। विशेषगरी सन् १९८६ को क्वार्टरफाइनल अझै पनि फुटबल इतिहासको चर्चित खेलमध्ये एक मानिन्छ।
उक्त खेलमा अर्जेन्टिनाका महान खेलाडी डिएगो म्याराडोनाले ‘ह्यान्ड अफ गड’ गोल गरेका थिए भने त्यसपछि गरेको उत्कृष्ट व्यक्तिगत गोलले अर्जेन्टिनालाई जित दिलाएको थियो।
स्कालोनीले म्याराडोनाको दोस्रो गोललाई फुटबल इतिहासकै उत्कृष्ट क्षणमध्ये एक बताए। ‘सबैले त्यो खेल र विशेषगरी दोस्रो गोल सम्झन्छन्। त्यो गोल सधैं फुटबलप्रेमीहरूको मनमा रहनेछ,’ उनले भने।
सन् १९८६ को खेल बेलायत र अर्जेन्टिनाबीचको फकल्यान्ड टापु विवादपछि भएको थियो। तर स्कालोनीले आगामी सेमिफाइनललाई राजनीतिक विषयसँग जोड्न नहुने बताएका छन्।
‘यो फुटबल खेल हो। धेरै पुराना घटनालाई यससँग मिसाउन चाहन्नँ। त्यो हाम्रो इतिहासको दुःखद समय थियो, तर अहिले हाम्रो ध्यान खेलमा मात्र छ,’ उनले भने।
.gif)
(1).gif)
बेलिङ्घम र केन अर्जेन्टिनाको मुख्य चुनौती
स्कालोनीले इंग्ल्यान्डका स्टार खेलाडी जुड बेलिङ्घम र ह्यारी केनबाट हुने चुनौतीबारे पनि चर्चा गरे। यी दुई खेलाडीले यस विश्वकपमा इंग्ल्यान्डका १३ मध्ये १२ गोलमा योगदान दिएका छन्।
‘उनीहरू विश्वकै उत्कृष्ट खेलाडीमध्ये पर्छन्। कुनै पनि प्रशिक्षकले यस्ता खेलाडी आफ्नो टोलीमा चाहन्छ,’ स्कालोनीले भने।
उनले इंग्ल्यान्डका प्रमुख खेलाडीलाई रोक्न रणनीतिमा परिवर्तन गर्न सकिने संकेत गरे पनि हालको टोलीलाई निरन्तरता दिने सम्भावना पनि रहेको बताए।
विश्वकपको सेमिफाइनलमा पुगेका अर्जेन्टिना र इंग्ल्यान्ड दुवैका लागि यो खेल फाइनल प्रवेशको निर्णायक अवसर हो। अर्जेन्टिना सन् २०२२ को उपाधि रक्षा गर्दै लगातार दोस्रो पटक फाइनल पुग्ने लक्ष्यमा छ भने इंग्ल्यान्ड लामो समयपछि विश्वकप उपाधि जित्ने अभियानमा अघि बढिरहेको छ।
.png)
