नेप्सेमा सामान्य अंकको गिरावट, फाइनान्स समूहमा चमक

काठमाण्डौ । साताको चौथो कारोबार दिन आज पनि नेपाल स्टक एक्सचेञ्च(नेप्से) मा सामान्य अंकको गिरावट आएको छ । आज नेप्से परिसूचक ०.१६ प्रतिशत अर्थात ४.४५ अंकले घटेर २ हजार ७११.४५ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.२३ प्रतिशतले घटेर ४५६.०४ विन्दुमा झरेको छ । यो दिन नेप्सेमा सूचीकृत मध्ये ३०९ वटा स्क्रिप्टको १ करोड ९१ लाख ८१ हजार ४१४ कित्ता सेयर ८ अर्ब ९५ करोड ८० लाख रुपैयाँभन्दा बढीको कारोबार भएको  छ ।

आजको बजारबारे नेपाल पूँजी बजार लगानीकर्ता संघकी अध्यक्ष राधा पोखरेल भन्छिन्,  ‘आजको बजारको गिरावटलाई सामान्य करेक्सनको रुपमा लिन सकिन्छ । लगानीकर्ता अझै पनि मौद्रिक नीतिको समीक्षाको प्रतिक्षामा छन् । बजारलाई सकारात्मक प्रभाव पार्ने केही कुरा नआउँदा अहिले लगानीकर्ताको मनोबल पनि कमजोर देखिन्छ । ’

उनले लगानीकर्ताहरु यतिबेला पूँजी बजारमा सुधार आउने विषयमा व्यग्र प्रतिक्षामा रहेको र यसका लागि ठोस नीति आवश्यक भएको बताइन् ।  

अर्का बजार जानकार मुक्ति बहादुर खत्रीले पनि लगानीकर्ता मौद्रिक नीतिको समीक्षाको प्रतिक्षामा रहेको बताए । ‘आजको घटाई बाबजुत बजार २७ सय विन्दुमाथि नै रहेकाले आत्तिनु पर्ने अवस्था भने बजारमा छैन । सबै कुरा सकारात्मक भएका माथि जानका लागि बजार अहिले बेस क्यापमा अडिएको जस्तो देखिन्छ’ उनले भने ।    

यो दिन नेप्सेमा सूचीकृत १३ वटा समूहमध्ये ५ वटामा हरियाली छायो भने अन्य ८ वटा समूहमा रातो पोतियो । फाइनान्स समूहमा आज सर्वाधिक वृद्धि देखियो । यो समूह आज ५.६७ प्रतिशतले बढ्यो । यस्तै हाईड्रो समूह ०.०४,म्युचुअल फण्ड ०.९०,निर्जीवन बीमा ०.१९ र अन्य समूह ०.२८ प्रतिशतले बढ्यो ।  

आज घटेका ८ वटा समूहमध्ये व्यापार समूह सर्वाधिक ओरालो लाग्यो । यो समूह आज १.४२ प्रतिशतले घट्यो । बैंकिङ समूह पनि आज ०.२६ प्रतिशत,विकास बैंक ०.९१,होटल ०.४८,लगानी ०.२४,जीवन बीमा ०.३१,उत्पादन तथा प्रशोधन ०.८१ र लघुवित्त ०.२६ प्रतिशतले घट्यो ।    

धेरै कारोबार गर्ने कम्पनीहरु

यो दिन नेपाल पुनर्बीमा कम्पनीको सर्वाधिक सेयर कारोबार भयो । आज यो कम्पनीको ३३ करोड ७६ लाख बढीको कारोबार भयो । हिमालयन पावर पार्टनरको आज २७ करोड १४ लाख,सिनर्जी पावरको २२ करोड २० लाख,ग्रिन डेभलपमेन्ट बैंकको २० करोड ९३ लाख र हिमालयन उर्जाको १९ करोड ९१ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज उपकार लघुवित्त,छ्याङदी हाईड्रोपावर,सेन्ट्रल फाइनान्स र पोखरा फाइनान्सको सेयरमूल्यमा अपर सर्किट लाग्यो ।  

यस्तै समृद्धि फाइनान्सको सेयरमूल्य ९.४६ प्रतिशत,भूगोल इनर्जीको ९.०१,गृह्वेश्वरी मर्चेन्टको ८.०२ र प्रोग्रेसिभ फाइनान्सको सेयरमूल्य ७.६२ प्रतिशतले बढ्यो ।  

यो दिन दुईवटा कम्पनीको सेयरमूल्यमा लोअर सर्किट लाग्यो । सामुदायिक लघुवित्त र कर्पोरेट डेभलपमेन्ट बैंकको सेयरमूल्यमा आज लोअर सर्किट लाग्यो । मध्य भोटेकोशीको सेयरमूल्य पनि आज ५.६० प्रतिशत,न्यादी हाईड्रोको ५.५६ र ग्रिन डेभलपमेन्ट बैंकको सेयरमूल्य ४.८२ प्रतिशतले घट्यो ।