पाकिस्तानलाई समर्थन गरेको टर्कीप्रति कठोर बन्दै भारत, उठायो यस्तो कदम

काठमाण्डौ । भारत र पाकिस्तानबीचको तनावका बीच टर्कीले पाकिस्तानलाई दिएको समर्थनलाई लिएर भारत सरकारले कडा अडान लिएको छ । भारत सरकारले अब भारतभर चलिरहेका टर्की लगानी परियोजनाहरूको समीक्षा गर्न लागेको छ। यसको प्रत्यक्ष असर यूपी र दिल्ली सहित देशका ५ राज्यमा चलिरहेको मेट्रो, सुरुङ र निर्माण परियोजनामा ​​पर्न सक्ने जनाइएको ।

टर्कीले भारतमा धेरै विदेशी लगानी गरेको छ । अप्रिल २००० देखि सेप्टेम्बर २०२४ सम्म टर्कीबाट २४  करोड डलरबराबरको प्रत्यक्ष वैदेशिक लगानी भारतमा आएको छ। टर्की भारतमा लगानी गर्ने ४५ औं स्थानमा रहेको छ ।  

आर्थिक वर्ष २०२३/२४ मा दुई देशबीच १०.४ अर्ब डलरको द्विपक्षीय व्यापार भएको छ। टर्कीका कम्पनीहरूले देशका पाँच राज्यहरू, यूपी, दिल्ली, मुम्बई, गुजरात र जम्मू(कश्मीरमा आईटी, मेट्रो रेल र टनेललगायत विभिन्न प्रकारका परियोजनाहरूमा काम गरिरहेका छन्। यसबाहेक टर्कीका कम्पनीहरूले भारतमा निर्माण र प्रविधि जस्ता क्षेत्रमा लगानी गरेका छन् । लखनऊ, पुणे र मुम्बईमा मेट्रो परियोजनाहरू र गुजरातमा निर्माण इकाईहरू यसका उदाहरण हुन्।

बिहीबार भारत सरकारले टर्कीको उड्डयन कम्पनी सेलेबीको सेक्युरिटी क्लियरेन्स खारेज गरेको छ । यो कम्पनीले भारतका ९ वटा विमानस्थलमा सेवा प्रदान गर्दै आएको छ । अब यो कम्पनीले यी विमानस्थलमा आफ्नो सेवा उपलब्ध गराउन सक्नेछैन । अर्कोतर्फ केन्द्र सरकारले टर्कीका अन्य कम्पनीका सबै सरकारी तथा निजी आयोजनाको जानकारी संकलन गर्न थालेको छ । यी कम्पनीहरूको भूमिका र हिस्सेदारी समीक्षा गरी आवश्यक कारबाही गरिनेछ। राष्ट्रिय हितमा असर परे यी कम्पनीलाई आयोजनाबाट हटाउन पनि सकिने भारतीय अधिकारीहरुको भनाइ छ ।

भारत र टर्कीबीचको आयात÷निर्यात पनि आगामी दिनमा बन्द हुन सक्ने जनाइएको छ।