मोरक्कोको राष्ट्रिय दिवसको अवसरमा काठमाण्डौमा विशेष प्रदर्शनी आयोजना

काठमाण्डौ । मोरक्कोका महामहिम राजा मोहम्मद छैटौँले राजगद्दी आरोहण गरेको २७ औँ वार्षिकोत्सव (राष्ट्रिय दिवस) को अवसरमा नेपालस्थित मोरक्को अधिराज्यका लागि महावाणिज्यदूतको कार्यालयले आइतबार विशेष समारोह तथा विविध कार्यक्रमको आयोजना गरेको छ ।

कार्यक्रमको शुभारम्भ साउन १७ गते आइतबार बिहान महावाणिज्यदूतको कार्यालय थापाथली, काठमाडौंमा झण्डोत्तोलन समारोहको आयोजना गरिएको छ ।

समारोहमा प्रमुख अतिथि नेपालका लागि मोरक्को अधिराज्यका महामहिम राजदूत मोहम्मद मलिकी र नेपालका लागि मोरक्को अधिराज्यका महावाणिज्यदूत मेघा चौधरीले राष्ट्रिय झण्डा फहराउँदै कार्यक्रमको शुभारम्भ गरे । सोही अवसरमा  मोरक्को अधिराज्य र नेपालको राष्ट्रिय गान प्रस्तुत गरिएको छ ।

कार्यक्रममा परराष्ट्र मन्त्रालयका शिष्टाचार महापाल, कूटनीतिक नियोगका प्रमुख तथा प्रतिनिधिहरू, व्यवसायी तथा विभिन्न क्षेत्रका विशिष्ट व्यक्तित्वहरूको सहभागिता रहेको छ ।

सो अवसरमा महावाणिज्यदूत मेघा चौधरीले राजा मोहम्मद छैटौँप्रति हार्दिक शुभकामना व्यक्त गर्दै उहाँको सुस्वास्थ्य, दीर्घायु तथा मोरक्को अधिराज्यमा निरन्तर शान्ति, समृद्धि र उन्नतिको कामना गरे । उनले नेपाल र मोरक्कोबीच रहेको मैत्रीपूर्ण सम्बन्ध आगामी दिनमा व्यापार, पर्यटन, लगानी तथा सांस्कृतिक आदान–प्रदानका माध्यमबाट अझ सुदृढ हुँदै जाने विश्वास व्यक्त गरे ।

मोरक्कोले हरेक वर्ष जुलाई ३० लाई वर्तमान राजा मोहम्मद छैटौँले राजगद्दी आरोहण गर्नुभएको दिनको सम्झनामा राष्ट्रिय दिवसको रुपमा राष्ट्रिय महत्वका साथ मनाउने गर्दछ । यो दिवसलाई मोरक्कोको राष्ट्रिय एकता, स्थायित्व र विकासप्रतिको प्रतिबद्धताको प्रतीक मानिन्छ । सो अवसरमा नेपालस्थित मोरक्को अधिराज्यका लागि महावाणिज्यदूतको कार्यालयद्धारा विशेष प्रदर्शनी तथा विशेष समारोह पनि आयोजना गरिएको छ ।

मोरक्कोको समृद्ध सांस्कृतिक सम्पदा, इतिहास तथा पर्यटन प्रवर्धन गर्ने उद्देश्यले प्रदर्शनीको आयोजना गरिएको हो । ललितपुरको द प्लाजामा हुने प्रदर्शनी आज बिहान ११ बजेदेखि साँझ ५ बजेसम्म सञ्चालन हुनेछ । प्रदर्शनीमा अवलोकनका लागि प्रवेश शुल्क लाग्नेछैन ।प्रदर्शनीमा मोरक्कन परिकार, परम्परागत माटोका सामग्री ९पोटरी०, मोरक्कन शैलीको सजावट, पर्यटनसम्बन्धी जानकारी तथा ट्राभल डेस्क रहनेछन् ।

मोरक्कोको संस्कृति, कला र पर्यटनलाई नेपालीमाझ परिचित गराउन र दुई देशबीचको सांस्कृतिक तथा जनस्तरीय सम्बन्धलाई सुदृढ बनाउन कार्यक्रमको आयोजना गरिएको नेपालका लागि मोरक्को अधिराज्यको अवैतनिक महावाणिज्यदूत मेघा चौधरीले जानकारी दिए ।

‘यो प्रदर्शनी मोरक्कोको कला, संस्कृति र पर्यटनलाई नेपालीमाझ परिचित गराउने थलो मात्र नभएर नेपाल र मोरक्कोबीचको द्विपक्षीय सम्बन्ध, सहकार्य, व्यापार तथा पर्यटकीय आदानप्रदानलाई थप मजबुत बनाउनेछ भन्ने विश्वास लिएको छु,’ महावाणिज्यदूत मेघा चौधरीले भन्नुभयो । यसैगरी, आइतबार साँझ मोरक्को र नेपालको पर्यटन तथा संस्कृतिका विषयमा विशेष संवाद कार्यक्रम तथा विशेष समारोहको पनि आयोजना गरिएको छ । सो अवसरमा मोरक्को कला, संस्कृति झल्किने विशेष डकुमेन्ट्री प्रस्तुत गरिनेछ ।

बीएलसी ग्लोबल होल्डिङ्गस् प्रालिकी सह–अध्यक्ष समेत रहनुभएकी मेघा चौधरी गत फागुनमा नेपालका लागि मोरक्को अधिराज्यको अवैतनिक महावाणिज्यदूतमा नियुक्त भएकी छन् ।

महावाणिज्यदूतमा नियुक्त भएसँगै उनले दुईदेशबीचको कुटनीतिक सम्बन्ध, संस्कृति, पर्यटन तथा व्यापार विस्तारमा महत्वपूर्ण भूमिका निर्वाह गर्दै आएकी छन् ।

महावाणिज्यदूत मेघा चौधरीकै पहलमा नेपाल र मोरक्को अधिराज्यबीचको आवगमनलाई सहज बनाउन भिसा आवेदन प्रक्रियामा सुधार गरिएको छ ।

नेपालीहरुले नेपालस्थित मोरक्को अधिराज्यका लागि महावाणिज्यदूतको कार्यलयबाट सिफारिस पत्रलाई भिसा आउटसोर्सिङ एजेन्सी भीएफएस ग्लोबल मार्फत भिसाका लागि आवेदन दिन र भिसा प्राप्त गर्न सक्ने व्यवस्था गरिएको छ । यो व्यवस्थाले भिसा प्रक्रियाका लागि नेपालीहरु भारतमा जानु नपर्ने व्यवस्था मिलाइएको छ ।