सुशीला कार्कीको नामप्रति असहमति जनाउँदै जंगीअड्डा अगाडि नाराबाजी, बालेन/हर्क जस्ता युवा ल्याइनुपर्ने माग

काठमाण्डौ । जेनजीको विभिन्न समूहबीच अन्तरिम सरकारको प्रमुखको रुपमा अगाडि बढाउने नामको विषयमा आपसी असहमति देखिएको छ ।  

जेनजीको एउटा ठूलो समूहले अन्तरिम सरकारको प्रमुखको रुपमा पूर्व प्रधानन्यायाधीश सुशीला कार्कीको नाम अगाडि बढाउनुपर्ने निर्णय गर्दै सोही व्यहोराको जानकारी नेपाली सेनालाई पठाइसकेको छ । 

सोही विषयमा जंगगी अड्डामा जेनजीका प्रतिनिधिहरुसँग वार्ता भइरहँदा बाहिर भने युवाहरुको ठूलो समूहले सुशीला कार्कीको नामप्रति असन्तोष पोख्दै नाराबाजी गरिरहेका छन् ।  

जंगगी अड्डा अगाडि भेला भएका जेनजीहरुले बालेन शा, हर्क साम्पांग, सागर ढकाल जस्ता युवा पुस्तालाई अन्तरिम सरकार प्रमुखको रुपमा अगाडि बढाउनुपर्ने भन्दै नाराबाजी गरेका हुन् ।

उनीहरुले सुशीला कार्कीलाई अन्तरिम सरकार प्रमुख बनाएर फेरि बूढाहरुलाई नै ल्याउने प्रपञ्च आफूहरुलाई स्वीकार्य नहुने समेत सो क्रममा बताएका छन् । 

अहिले नेपाली सेनाले जेनजीका विभिन्न समूहहरुबाट उनीहरुले दिने सम्भावित अन्तरिम सरकार प्रमुखको नाम, अजेण्डा लगायतको विषयमा बुझ्ने काम गरिरहेको छ । सबै समूहको कुरा बुझेपछि ठोस विषयसहित राष्ट्रपतिसँग वार्ता गराउने सेनाको प्रयास छ ।  

फोटो क्रेडिट: सुवास श्रेष्ठ