निर्वाचनका दिन पर्यटक सवारी सञ्चालन गर्न दुई दिनअघि अनुमति अनिवार्य

काठमाण्डौ । प्रतिनिधिसभा सदस्य निर्वाचनका दिन पर्यटकहरूको आवागमन सहज बनाउन सवारी साधन सञ्चालनका लागि पूर्वअनुमति अनिवार्य गरिएको छ। निर्वाचन आयोगले जारी गरेको ‘सवारी साधनको अनुमतिसम्बन्धी कार्यविधि, २०८२’ अनुसार पर्यटक बोक्ने सवारी साधनले निर्वाचनको दिन सञ्चालन हुन कम्तीमा दुई दिनअघि अनुमति लिनुपर्ने व्यवस्था गरिएको हो।

आयोगका अनुसार निर्वाचनका दिन राष्ट्रिय तथा अन्तर्राष्ट्रिय हवाइ उडानहरू नियमित रूपमा सञ्चालन हुने भएकाले हवाईमार्गबाट आउने–जाने पर्यटकहरूको आवागमनलाई ध्यानमा राखी यस्तो व्यवस्था गरिएको हो।

काठमाण्डौ उपत्यकाभित्र सञ्चालन हुने सवारी साधनका लागि आयोगबाट तथा अन्य जिल्लामा सम्बन्धित जिल्ला प्रशासन कार्यालयबाट पूर्वस्वीकृति लिनुपर्नेछ।

कार्यविधिमा राजमार्गमा चल्ने सवारी साधनको आवागमनलाई व्यवस्थित तुल्याउने प्रावधानसमेत समावेश गरिएको छ। यसबाहेक अत्यावश्यक सेवा, कूटनीतिक नियोग तथा राष्ट्रिय मानव अधिकार आयोग बाहेक अन्य सवारी साधनले पनि तोकिएको प्रक्रिया पूरा गरी अनुमति लिएर सञ्चालन गर्न सक्ने व्यवस्था गरिएको आयोगले जनाएको छ।