सरकारको एकपछि अर्को एक्सन: ओली, प्रचण्ड र देउवाविरुद्ध सम्पत्ति शुद्धिकरण अनुसन्धान सुरु

काठमाण्डौ । मुलुकका तीन पूर्वप्रधानमन्त्रीसहित उच्च तहका नेताहरूको सम्पत्ति र आयस्रोतबारे व्यापक छानबिन सुरु भएपछि राजनीतिक वृत्तमा ठूलो तरंग उत्पन्न भएको छ। सम्पत्ति शुद्धीकरण अनुसन्धान विभाग (DMLI) को निर्देशनपछि नेपाल प्रहरीले केपी शर्मा ओली, पुष्पकमल दाहाल ‘प्रचण्ड’ र शेरबहादुर देउवामाथि पनि औपचारिक रूपमा अनुसन्धान अघि बढाएको हो।

प्रहरी स्रोतका अनुसार तीनै पूर्वप्रधानमन्त्रीका साथै पूर्वमन्त्रीहरू आरजु राणा देउवा र दीपक खड्का तथा उनीहरूका परिवारका सदस्यहरूको नाममा रहेका चल–अचल सम्पत्ति, बैंकिङ कारोबार र आम्दानीका स्रोतबारे विस्तृत छानबिन भइरहेको छ। यसै क्रममा आरजु राणाका भाइ भुषण राणामाथि पनि अनुसन्धान विस्तार गरिएको बताइएको छ।

‘जलेका नोट’बाट सुरु भयो अनुसन्धान

गत भदौ २४ गते भएको आगजनी घटनापछि देउवा, दाहाल र खड्काको घरबाट जलेका नोटका टुक्रा फेला परेपछि अनुसन्धानको दिशा मोडिएको जनाइएको छ। सो घटनाले शंकास्पद आर्थिक गतिविधि देखिएको भन्दै विभागले विस्तृत अनुसन्धानका लागि प्रहरीको केन्द्रीय अनुसन्धान ब्युरो (CIB) लाई जिम्मा दिएको हो।

दीपक खड्का पक्राउ, म्याद थपको तयारी

यसै प्रकरणमा कांग्रेस नेता तथा पूर्वऊर्जा मन्त्री दीपक खड्कालाई आइतबार बिहान बुढानीलकण्ठस्थित निवासबाटै पक्राउ गरिएको छ। CIB ले विभागकै पत्रका आधारमा उनलाई नियन्त्रणमा लिएको हो। आजै जिल्ला अदालतबाट म्याद थप गरी थप अनुसन्धान अघि बढाउने तयारी भइरहेको छ।

शीर्ष नेतासम्म अनुसन्धानको दायरा

प्रारम्भिक अनुसन्धानमा ‘कैफियत’ देखिएपछि विभागले तत्कालीन उच्च पदस्थ व्यक्तिहरूलाई समेत अनुसन्धानको दायरामा ल्याउन प्रहरीलाई पत्राचार गरेको थियो। सोही आधारमा अहिले पूर्वप्रधानमन्त्रीहरू समेत अनुसन्धानको घेरामा परेका हुन्।

संवेदनशील मोडमा राजनीति

देशका शक्तिशाली राजनीतिक नेतृत्वमाथि एकैसाथ सम्पत्ति शुद्धीकरणको अनुसन्धान अघि बढ्नुले राष्ट्रिय राजनीतिमा गम्भीर बहस सुरु भएको छ। पारदर्शिता, उत्तरदायित्व र शक्तिको दुरुपयोगबारे प्रश्नहरू उठ्न थालेका छन्।