ईरानी राजदूतले पाकिस्तानको प्रयासबारे भने, ‘युद्ध रोक्ने प्रयासहरू महत्वपूर्ण मोडमा पुग्यो’

काठमाण्डौ । पाकिस्तानस्थित इरानका राजदूत रजा अमीरी मुकद्दमले अमेरिका र इरानबीच बढ्दो तनावलाई नियन्त्रणमा ल्याउन पाकिस्तानले गरिरहेको कूटनीतिक पहल निर्णायक चरणमा पुगेको बताएका छन्।

सामाजिक सञ्जाल ‘एक्स’ मार्फत उनले जनाएअनुसार, अमेरिका र इसराइलसँग सम्बन्धित क्षेत्रीय तनाव कम गर्न पाकिस्तानले अघि सारेका सकारात्मक र रचनात्मक प्रयासहरू अहिले महत्वपूर्ण मोडमा पुगेका छन्। यद्यपि उनले यसबारे विस्तृत जानकारी सार्वजनिक गरेका छैनन् र थप विवरण चाँडै उपलब्ध हुने संकेत दिएका छन्।

यसैबीच, अमेरिका र इरान दुवैले पाकिस्तानले प्रस्ताव गरेको दुईस्तरीय योजना अघिल्लो दिन अस्वीकार गरेका थिए। उक्त प्रस्तावमा युद्धविराम घोषणा गर्ने र रणनीतिक दृष्टिले महत्वपूर्ण मानिने हर्मुज जलडमरूमध्य पुनः सञ्चालनमा ल्याउने विषय समावेश थियो।

अमेरिकी राष्ट्रपति डोनाल्ड ट्रम्पले इरानलाई हर्मुज जलडमरूमध्य खोल्न अल्टिमेटम दिएका छन्। उक्त समयसीमा अब २४ घण्टाभन्दा कम मात्र बाँकी रहेको जनाइएको छ।छ।