लक्ष्मी सनराइज बैंकको नाफा २३.३६% ले बढ्यो, लाभांश क्षमता र ईपीएस कति ?

काठमाण्डौ । लक्ष्मी सनराइज बैंकको खुद नाफा २३.३६ प्रतिशतले बढेको छ । बैंकले चालु आवको तेस्रो त्रैमासको वित्तीय विवरण सार्वजनिक गर्दै समीक्षा अवधिसम्म २ अर्ब ३ करोड रुपैयाँबराबरको खुद नाफा कमाएको जनाएको छ ।

अघिल्लो आवको सोही अवधिसम्म भने बैंकको खुद नाफा १ अर्ब ६५ करोडमा सीमित थियो ।

यस्तै बैंकको खुद ब्याज आम्दानीमा भने ०.२१ प्रतिशतको झिनो गिरावट आएको छ । अघिल्लो आवमा ७ अर्ब ८९ करोड रुपैयाँ रहेको ब्याज आम्दानी ७ अर्ब ८७ करोडमा सीमित बनेको छ । बैंकको खुद शुल्क तथा कमिशन आम्दानी १ अर्ब ५२ करोडबाट बढेर १ अर्ब ७३ करोड पुगेको छ ।

यो अवधिमा बैंकको खराब कर्जा अनुपात र कस्ट अफ फण्ड घटेको छ । बैंकको खराब कर्जा अनुपात ५.८६ प्रतिशतबाट घटेर ५.२९ प्रतिनशत कायम भएको छ ।

यस्तै बैंकको कस्ट अफ फण्ड समेत ३.४५ प्रतिशतमा सीमित बनेको छ । अघिल्लो आवमा कस्ट अफ फण्ड ४.७१ प्रतिशत रहेको थियो । यो अवधिमा बैंकको निक्षेप संकलन र कर्जा प्रवाह दुवै बढेको छ । अघिल्लो आवको तेस्रो त्रैमाससम्म ३ खर्ब ६७ अर्ब रहेको बैंकको निक्षेप संकलन बढेर ४ खर्ब ३ अर्ब पुगेको छ । यस्तै कर्जा प्रवाह पनि २ खर्ब ७४ अर्बबाट बढेर ३ खर्ब २ अर्ब पुगेको छ ।

बैंकको वितरणयोग्य मुनाफा ३३.२० प्रतिशतले घटेर ५१  करोड ६१ लाखमा सीमित बनेको छ । लाभांश क्षमता पनि ३.१७ प्रतिशतबाट खस्किएर १.९३ प्रतिशतमा सीमित बन्न पुगेको छ ।

समीक्षा अवधिसम्म बैंकको प्रतिसेयर आम्दानी १०.१५ रुपैयाँ, प्रतिसेयर नेटवर्थ १७५.०८ रुपैयाँ, मूल्य आम्दानी अनुपात २१.२४ गुणा र तरलता अनुपात ३०.११ प्रतिशत कायम भएको छ ।