लुम्बिनी विकास बैंकको नाफामा १०२८% को उछाल, ईपीएस २०.६७ रुपैयाँ पुग्यो

काठमाण्डौ । लुम्बिनी विकास बैंक लिमिटेडको समग्र वित्तीय अवस्थामा आकर्षक सुधार आएको छ । बैंकले चालु आवको तेस्रो त्रैमाससम्म अधिकांश वित्तीय सूचकमा अब्बल प्रदर्शन गरेको छ ।

तेस्रो त्रैमाससम्म बैंकले ५६ करोड १६ लाख रुपैयाँबराबरको खुद नाफा आर्जन गरेको छ । यो रकम अघिल्लो आवको सोही अवधिको तुलनामा १०२८.२५ प्रतिशतले बढी हो । अघिल्लो आवको उक्त अवधिसम्म भने बैंकले ४ करोड ९७ लाख रुपैयाँबराबरको खुद नाफा आर्जन गरेको थियो ।

यस्तै बैंकको खुद ब्याज आम्दानी पनि ७ प्रतिशतले बढेर १ अर्ब ४५ करोड पुगेको छ । बैंकको वितरणयोग्य मुनाफामा समेत उछाल आएको छ । अघिल्लो आवको तेस्रो त्रैमाससम्म ४ लाख ८० हजार रुपैयाँ रहेको बैंकको वितरणयोग्य मुनाफा ५२ करोड १२ लाख पुगेको छ । बैंकको लाभांश क्षमता समेत ०.०२ प्रतिशतबाट बढेर १७.४८ प्रतिशत पुगेको छ ।

बैंकको खराब कर्जा अनुपात ७.१८ प्रतिशतबाट घटेर ६.४९ प्रतिशतमा सीमित बनेको छ । रिटर्न अन इक्विटी १ प्रतिशतबाट बढेर १०.०६ प्रतिशत पुगेको छ ।

समीक्षा अवधिसम्म बैंकको प्रतिसेयर आम्दानी २०.६७ रुपैयाँ, प्रतिसेयर नेटवर्थ २०५.४० रुपैयाँ र तरलता अनुपात २७.०४ प्रतिशत कायम भएको छ ।