(2).gif)
.png)
काठमाण्डौ । भारतको पश्चिम बंगाल विधानसभा निर्वाचनमा भारतीय जनता पार्टी (भारतीय जनता पार्टी) ऐतिहासिक जिततर्फ अग्रसर भएको देखिएको छ। हालसम्म सार्वजनिक प्रारम्भिक मतपरिणामअनुसार पार्टीले करिब दुई तिहाइ बहुमतसहित राज्य सरकार गठन गर्ने स्थितिमा पुगेको संकेत देखिएको छ।
निर्वाचन आयोगका पछिल्ला रुझानअनुसार २९३ सिटमध्ये भाजपाले करिब १९५ सिटमा अग्रता कायम गरेको छ भने सत्तारुढ तृणमूल कांग्रेस (तृणमूल कांग्रेस) करिब ९२ सिटमा अघि रहेको छ। यदि यो प्रवृत्ति अन्तिम परिणाममा परिणत भयो भने पश्चिम बंगालमा पहिलो पटक भाजपा सरकार बन्नेछ।
यसअघि १५ वर्षदेखि पश्चिम बंगाल राज्यमा ममता बनर्जीको शासन चल्दै आईरहेको थियो ।
यसपटकको निर्वाचनले राज्यको राजनीतिक सन्तुलनमा ठूलो परिवर्तन ल्याउने संकेत गरेको छ। सीमावर्ती क्षेत्र, आदिवासी बहुल क्षेत्र तथा औद्योगिक क्षेत्रहरूमा भाजपाले उल्लेखनीय अग्रता बनाएको छ भने राजधानी कोलकाताका केही भाग तथा ग्रामीण क्षेत्रमा तृणमूलको प्रभाव कायम देखिएको छ।
मतगणनाको प्रारम्भिक चरणमा भाजपा र तृणमूलबीच कडा प्रतिस्पर्धा देखिए पनि इलेक्ट्रोनिक भोटिङ मेसिनबाट मतगणना अगाडि बढ्दै जाँदा भाजपाले स्पष्ट अग्रता बनाएको हो।
लामो समयदेखि सत्ता सञ्चालन गरिरहेको तृणमूल सरकारप्रति देखिएको असन्तुष्टि भ्रष्टाचार र ‘सिन्डिकेट राज’ विरुद्धको आक्रामक अभियान, सूक्ष्म व्यवस्थापन र बुथ स्तरसम्मको संगठन सुदृढीकरण, सीमापार अवैध आप्रवासन र सुरक्षाको मुद्दा उठान, ‘सोनार बांग्ला’ विकासको नारासहित आर्थिक तथा रोजगारीका प्रतिबद्धता, महिला तथा युवा मतदातालाई लक्षित कार्यक्रमहरू जस्ता विषयलाई भाजपाको सम्भावित जितका प्रमुख कारणहरू मानिएको छ ।
मुख्यमन्त्री ममता बनर्जी नेतृत्वको तृणमूल कांग्रेसले केही परम्परागत क्षेत्रहरूमा आफ्नो पकड कायम राखे पनि समग्र रूपमा कमजोर प्रदर्शन देखिएको छ। प्रमुख निर्वाचन क्षेत्र भवानीपुरमा ममता बनर्जी र भाजपाका नेता सुवेन्दु अधिकारी बीच कडा प्रतिस्पर्धा देखिएको छ, जहाँ प्रारम्भिक चरणमा उतारचढाव भए पनि ममता बनर्जी पछि अग्रस्थानमा पुगेकी छन्।
हालसम्मको मतगणना रुझानले पश्चिम बंगालको राजनीतिक इतिहासमा नयाँ अध्याय सुरु हुन सक्ने संकेत गरेको छ। अन्तिम परिणाम आउन बाँकी रहे पनि भाजपाको प्रदर्शनले राज्यको शक्ति सन्तुलनमा ठुलो परिवर्तन ल्याउने स्पष्ट संकेत दिएको छ।
.png)
.jpg)
.jpg)
.jpg)
