दरबारमार्गमा ‘एक्स्ट्रिम स्याटरडे’को तयारी, सडक फेरि बन्ने युवा र मनोरञ्जनको केन्द्र

काठमाण्डौ । राजधानीको प्रमुख पर्यटकीय तथा व्यावसायिक क्षेत्र दरबारमार्गमा फेरि एकपटक सांगीतिक, सांस्कृतिक र मनोरञ्जनात्मक माहोल बन्ने भएको छ । 

आगामी जेठ ९ गते आयोजना हुन लागेको ‘१९औँ दरबारमार्ग स्ट्रिट फेस्टिभल’ यसपटक ‘एक्स्ट्रिम स्याटरडे (Xtreme Saturday)’ को थीमसहित आयोजना गरिन लागेको हो ।

दरबारमार्ग विकास बोर्डको पहलमा माभेरिक्स ग्रुप र आर्बिट्ररी इभेन्ट्सद्वारा आयोजना हुन लागेको यो महोत्सवलाई यसवर्ष ‘एक्स्ट्रिम इनर्जी ड्रिंक’ले मुख्य प्रायोजन गरेको आयोजकले जनाएको छ । आयोजकका अनुसार महोत्सवले युवादेखि परिवारसम्म सबै उमेर समूहलाई लक्षित गर्दै मनोरञ्जन, संगीत, खानपान र सांस्कृतिक गतिविधिलाई एकै थलोमा ल्याउने तयारी गरिएको छ ।

हरेक वर्षझैँ यसपटक पनि दरबारमार्ग क्षेत्रमा खुला सडक महोत्सवको स्वरूपमा आयोजना हुने कार्यक्रम सर्वसाधारणका लागि निःशुल्क रहनेछ । आयोजकले महोत्सवलाई काठमाडौँको ‘अर्बन लाइफस्टाइल फेस्टिभल’को रूपमा स्थापित गर्ने प्रयास भइरहेको जनाएको छ ।

महोत्सवमा बालबालिकाका लागि विभिन्न खेल, थ्री–बाइ–थ्री बास्केटबल, ई–स्पोर्ट्स, कोस्प्ले, फोटो बुथ, सांस्कृतिक झाँकी तथा विभिन्न स्वादका खानाका स्टलहरू रहनेछन् । त्यस्तै मुख्य स्टेजसँगै सहायक स्टेजमा पनि डीजे प्रस्तुति र लाइभ म्युजिकले माहोल तताउने बताइएको छ ।

यसपटकको सांगीतिक प्रस्तुतिमा चर्चित ब्यान्ड तथा कलाकारहरूको सहभागिता रहनेछ । आयोजकका अनुसार John & The Locals, The Axe, Folktronics, ST Man, Jay Author, Salin Magar & Band, Preezol Nepal & Sarara तथा Gone Elvis ले प्रस्तुति दिनेछन् ।

कार्यक्रम सञ्चालन रेमन दास श्रेष्ठ, रुविष्का श्रेष्ठ, सुदित श्रेष्ठ र सलिना महर्जनले गर्ने तय भएको छ ।

पछिल्ला वर्षहरूमा दरबारमार्ग स्ट्रिट फेस्टिभलले राजधानीको सांस्कृतिक तथा पर्यटन गतिविधिमा विशेष आकर्षण थप्दै आएको छ । विशेषगरी युवा पुस्तामाझ लोकप्रिय बन्दै गएको यो महोत्सवले होटल, रेस्टुरेन्ट, क्याफे र खुद्रा व्यापार क्षेत्रमा समेत चहलपहल बढाउने अपेक्षा गरिएको छ ।

आयोजकका अनुसार यसवर्षको ‘एक्स्ट्रिम स्याटरडे’ अघिल्ला संस्करणभन्दा अझ बढी ऊर्जावान, भव्य र स्मरणीय बनाइने लक्ष्य राखिएको छ ।