इरानसँगको वार्तामा महत्त्वपूर्ण प्रगति तर अन्तिम सम्झौता भने हुन बाँकी छ: रुबियो

काठमाण्डौ । अमेरिकी विदेशमन्त्री मार्को रुबियोले भारतको नयाँ दिल्लीमा आयोजित पत्रकार सम्मेलनमा इरानसँग जारी वार्तामा महत्त्वपूर्ण प्रगति भएको बताएका छन्। उनले भने, ‘अन्तिम सहमति भने भइसकेको छैन, तर पछिल्ला ४८ घण्टामा सकारात्मक प्रगति भएको छ।’

रुबियोले अमेरिकी धारणा दोहोर्‍याउँदै इरानलाई कुनै पनि अवस्थामा आणविक हतियार राख्न नदिइने स्पष्ट पारे। अमेरिकी राष्ट्रपति डोनाल्ड ट्रम्पले पनि यस विषयमा कठोर अडान लिएको उनले बताए। इरानलाई आणविक रूपमा अझ शक्तिशाली बनाउने खालको कुनै सम्झौता हुने कल्पना हास्यास्पद भएको समेत रुबियोले बताए ।

पत्रकार सम्मेलनमा रुबियोले स्ट्रेट अफ हर्मुजसम्बन्धी सकारात्मक संकेत पनि दिएका छन्। उनले भने, ‘यदि पछिल्ला प्रगतिहरू सफल भए भने हर्मुज जलमार्ग पूर्ण रूपमा खुला हुन सक्छ, र कुनै शुल्क पनि लाग्ने छैन।’ यद्यपि उनले अझै केही काम बाँकी रहेको र थप घोषणा राष्ट्रपति ट्रम्पले गर्न सक्ने बताए।

पत्रकारले इरानमा युद्ध सुरु भएयता विद्यालयहरूमा भएको क्षतिबारे प्रश्न उठाएपछि रुबियोले सैन्य रणनीतिबारे टिप्पणी गर्न अस्वीकार गरे। उनले अमेरिकी उद्देश्य इरानको नौसैनिक क्षमता, ब्यालिस्टिक मिसाइल प्रहार क्षमता तथा रक्षा औद्योगिक संरचनालाई कमजोर बनाउनु रहेको बताए। ‘एपिक फ्युरी’ नाम दिइएको अमेरिकी अभियानले आफ्नो लक्ष्य हासिल गरेको उनको दाबी थियो।