राष्ट्र बैंकको सहप्रवक्ता र सूचना अधिकारीको जिम्मेवारीबाट हटे न्यौपाने, नयाँ जिम्मेवारी श्रेष्ठलाई

काठमाण्डौ ।  नेपाल राष्ट्र बैंकका कार्यकारी निर्देशक सुमन न्यौपानेले सहप्रवक्ता र सूचना अधिकारीको जिम्मेवारीबाट हटेका छन् । न्यौपानेले उक्त पदबाट आजदेखि विश्राम लिएको जानकारी दिएका हुन् ।

‘एक वर्ष भन्दा बढी अवधिमा यहाँहरूको नजिक रहेर बैंकका कामकारबाहीसँग सम्बन्धित सूचना र जानकारीहरू सम्प्रेषण गर्ने अवसर प्राप्त भएकोमा म आभारी छु, उनले भने, ‘यस क्रममा यहाँहरूबाट प्राप्त सहयोग र सहकार्यका निम्ति कृतज्ञ छु । यस अवधिमा कार्यव्यस्तता वा अन्य कुनै कारणले यहाँहरूमध्ये कतिपयको टेलिफोन कलहरू मैले समयमै उठाउन असमर्थ रहेको हुन सक्छु। त्यसप्रति म क्षमाप्रार्थी छु । उक्त जिम्मेवारीमा रहँदा यहाँहरूलाई सकेसम्म छिटो र यथार्थ सूचना उपलब्ध गराउने सदैव मेरो प्रयास रहेको ब्यहोरा अनुरोध गर्दछु ।’

यस्तै उनले आगामी सातादेखि आफूले नेपाल राष्ट्र बैंक, विराटनगर कार्यालयको प्रमुखको जिम्मेवारी सम्हाल्ने समेत बताए । उनी जिम्मेवारीबाट हटेपछि आजकै मितिदेखि नेपाल राष्ट्र बैंकको सहप्रवक्ता र सूचना अधिकारीको जिम्मेवारी कामु निर्देशक सुधा श्रेष्ठले सम्हालेकी छन् ।