प्रतिनिधिसभा बैठक दिउँसो १ बजे बस्दै, आगामी आव ०८३/८४ को बजेटमाथि सैद्धान्तिक छलफल हुने

काठमाण्डौं । सङ्घीय संसद् अन्तर्गत प्रतिनिधिसभाको बैठक आज बस्ने भएको छ।  

बैठक दिउँसो १ बजेका लागि तय गरिएको छ भने यसका लागि संसद् सचिवालयले विस्तृत कार्यसूची सार्वजनिक गरेको छ।

बैठकको प्रारम्भमा सम्माननीय सभामुख डीपी अर्यालले राष्ट्रपति कार्यालयबाट प्राप्त विभिन्न विधेयक प्रमाणीकरणसम्बन्धी पत्रको व्यहोरा सदनमा जानकारी गराउने कार्यक्रम रहेको छ।  

उक्त जानकारीपछि हालसम्म पारित भइसकेका विधेयकहरू औपचारिक रूपमा कार्यान्वयन प्रक्रियामा प्रवेश गरेको विवरण सभासद्हरूलाई अवगत गराइनेछ।

यसपछि बैठकको मुख्य केन्द्रबिन्दू आगामी आर्थिक वर्ष २०८३/८४ को बजेटमाथिको सैद्धान्तिक छलफल रहनेछ।  

कार्यसूचीअनुसार अर्थमन्त्री डा. स्वर्णिम वाग्लेले आगामी आर्थिक वर्षको राजस्व तथा व्ययको वार्षिक अनुमान (बजेट) माथि सामान्य छलफल प्रारम्भ गरियोस् भन्ने प्रस्ताव सदनमा प्रस्तुत गर्नेछन्।

अर्थमन्त्रीको प्रस्ताव पेश भएपछि प्रतिनिधिसभामा बजेटमाथिको सैद्धान्तिक छलफल औपचारिक रूपमा शुरु हुनेछ।

यस चरणमा सांसदहरूले सरकारद्वारा प्रस्तुत बजेटका उद्देश्य, प्राथमिकता, नीति तथा कार्यक्रम, साथै स्रोत विनियोजन र क्षेत्रगत योजनाका विषयमा आफ्ना धारणा राख्ने अपेक्षा गरिएको छ।

संसद् सचिवालयका अनुसार बजेटमाथिको छलफल एकै चरणमा सीमित नभई क्रमशः अघि बढाइनेछ।  

प्रारम्भिक छलफलपछि विभिन्न मन्त्रालयगत शीर्षकहरूमा विस्तृत तथा दफावार छलफल गर्ने कार्यतालिका समेत निर्धारण गरिएको छ।

सरकारले प्रस्तुत गरेको बजेटलाई संसद्ले नीति, आवश्यकता र कार्यान्वयन क्षमताका आधारमा मूल्याङ्कन गर्दै आवश्यक सुझाव र संशोधनसहित अगाडि बढाउने संसदीय प्रक्रिया रहेको बताइएको छ।