६ लाख ६५ हजारसहित विराटनगर विमानस्थलबाट पक्राउ परे उपसचिव तामाङ

काठमाण्डौ । नेपाल सरकारका उपसचिव तथा राष्ट्रपति चुरे तराई–मधेश संरक्षण विकास समिति, मोरङका कार्यालय प्रमुख मिक्मार तामाङ ६ लाख ६५ हजार रुपैयाँ नगदसहित विराटनगर विमानस्थलबाट पक्राउ परेका छन्। बरामद भएको रकमको स्रोत तत्काल पुष्टि गर्न नसकेपछि प्रहरीले उनलाई नियन्त्रणमा लिएर अनुसन्धान अघि बढाएको हो।

दोलखा जिल्लाको भीमेश्वर नगरपालिका–९ स्थायी घर भएका तामाङ ३ साउनमा बुद्ध एयरको विमानमार्फत विराटनगरबाट काठमाण्डौ जाने तयारीमा थिए। विमानस्थलमा गरिएको सुरक्षा जाँचका क्रममा उनको झोलाबाट एक हजार दरका ५१५ थान र पाँच सय दरका ३०० थान नोट गरी कुल ६ लाख ६५ हजार रुपैयाँ बरामद भएको प्रहरीले जनाएको छ।

प्रहरीका अनुसार रकमको वैधानिक स्रोतबारे सोधपुछ गर्दा तामाङले तत्काल विश्वसनीय विवरण प्रस्तुत गर्न नसकेपछि उनलाई विमानस्थलबाटै नियन्त्रणमा लिइएको थियो। त्यसपछि थप अनुसन्धानका लागि जिल्ला प्रहरी कार्यालय मोरङको जिम्मा लगाइएको हो।