स्पेसएक्सको आईपीओमा चार गुणा बढी माग

काठमाण्डौ । एलन मस्कको अमेरिकी अन्तरिक्ष कम्पनी स्पेस एक्सले आईपीओका लागि लगानीकर्ताबाट असाधारण चासो प्राप्त गरेको छ। प्रारम्भिक बजार जानकारी अनुसार कम्पनीले आईपीओबाट ७५ अर्ब डलर उठाउने लक्ष्य राखेकोमा लगानीकर्ताबाट २५० अर्ब डलरभन्दा बढीको माग आएको छ, जुन प्रस्तावित सेयरभन्दा करिब ४ गुणा बढी हो।

रिपोर्ट अनुसार यो माग मुख्य रूपमा दीर्घकालीन लगानी गर्ने संस्थागत कोषहरूबाट आएको हो। आईपीओ बुक बिल्डिङ प्रक्रिया अझै जारी रहेको र अन्तिम मूल्य निर्धारण बिहीबार हुने अपेक्षा गरिएको छ।

कम्पनीको व्यवस्थापन टोलीले पनि लगानीकर्तासँग सक्रिय रूपमा छलफल गरिरहेको छ। एलन मस्कले केही अनलाइन बैठकमार्फत सम्भावित लगानीकर्तासँग संवाद गरेको बताइएको छ। साथै, कम्पनीकी अध्यक्ष ग्वाइन सटवेल र वित्त प्रमुख ब्रेट जोनसनले न्यूयोर्कमा ठूला संस्थागत लगानीकर्तासँग भेटघाट गरेका छन्।

आईपीओ रोडशोमा कम्पनीले आफ्नो प्रमुख व्यवसाय, रकेट प्रक्षेपण तथा उपग्रह सेवा साथै स्टारलिंक इन्टरनेट सेवा र भविष्यमा अन्तरिक्षमा आधारित कम्प्युटिङ तथा एआई पूर्वाधार विकास योजनालाई प्रमुख आकर्षणका रूपमा प्रस्तुत गरेको छ।

हालको विश्व बजारमा देखिएको अस्थिरता, विशेषगरी टेक कम्पनीको सेयरहरूको उतारचढाव र क्रिप्टो बजारमा गिरावटको बीचमा पनि स्पेसएक्सप्रति उच्च माग देखिनु बजारको ठूलो विश्वासको संकेतका रूपमा विश्लेषकहरूले टिप्पणी गरेका छन्।

तर अन्तिम मूल्य निर्धारण र सेयर बाँडफाँडपछि मात्र वास्तविक लगानी माग र बजार मूल्य स्पष्ट हुने बताइएको छ।