ग्राउण्ड जिरोका लगानीकर्तामा अन्यौलता, भन्छन् ‘सेयर बजार र राजनीतिमा खेलै खेल भयो ’

काठमाण्डौ । सधैंको साता जस्तै आज पनि हामीले नियमित स्तम्भ ‘ग्राउण्ड जिरो’लाई निरन्तरता दिएका छौं । यस क्रममा आज हामी ज्ञानेश्वर र अनामनगर आसपासका केही ब्रोकर हाउस पुगेर लगानीकर्ताहरुको बिचार बुझ्ने प्रयास गरेका छौ । आज हामी सबै भन्दा पहिले ज्ञानेश्वरमा रहेको सूमेरु सेक्यूरिटिज (स्टक ब्रोकर नम्बर ३९) मा पुग्यौं। आज बजार खासै चलायमान नभएको र  यस वर्षको अन्तिम दिन भएका कारण पनि होला ब्रोकर हासउहरुमा लगानीकर्ताहरुको उपस्थिति सामानय नै देखिन्थ्यो ।  

आज बजार बिहानैदेखि तल–माथि गर्दै थियो । दिनभर नै बजारले खासै गति लिन सकेन । यस ब्रोकरमा भेटिएका एक लगानीकर्ताले सरकारले समयमै गभर्नर नियुक्ति गर्न नसकेको बताए ।  यतिकैमा उनी सँगै बसेका अर्का एक लगानीकर्ताले भने  ‘अहिले सरकार कै भविष्य के होला भन्ने छ । गभर्नरको नियुक्ति कसरी समयमै हुन सक्ला ? प्रचण्ड फेरी बुढानिलकण्ठ पुगेको सुनिन्छ । ’ उनले थप्दै भने‘,  ‘देउवा पनि साह्रै सोझा रहेछन् । ओली र प्रचण्डले घुमाको घुमाइ गरे। ’ सेयर बजार र राजनीतिमा  खेलै खेल हुने भयो ।  

यसै ब्रोकरमा भेटिएका अर्का एक लगानीकर्ताले भने ‘लौ राधी हाइड्रो पो उचाले हामीले त पत्तै पाएनौं साथीहरु । ’ तपाईहरुसँग कति छ म त रित्तै ।’ उनलाई जवाफ दिँदै अर्का लगानीकर्ताले भने, ‘हामी पनि त्यही हो । पीर नगर्नुहोस अब बुद्धभूमि चल्ने सूचना सुनेको छु मैले ।’  

ब्रोकरहाउसमा यस्तै गफगाफ चल्दै थिए । यहाँबाट हामी कालिका स्थान स्थित (नेपाल स्टक हाउस) स्टक ब्रोकर नम्बर १४ मा पुग्यौं । यहाँ पनि केही लगानीकर्ता राजनीतिक गफ मै मस्त थिए । कोही भने मस्त निन्द्रामा झुलेका समेत भेटिए । बजार सामान्य अंकले तलमाथि गर्दै थियो ।  यतिकैमा एक लगानीकर्ताले नजिकैको साथिलाई ठट्यौलि पारमा भने  ‘उठ है साथी ! सपना के देखियो नि ? बजारले छलाङ मारेको ?’ सुतिरहेका लगानीकर्ताले हाई काढ्दै यो वषै यस्तै भएता पनि आउने वर्ष बजारले छलाङ मार्ने विश्वास व्यक्त गरे । यसै ब्रोकरमा भेटिएका केही लगानीकर्ताहरुले गभर्नरमा युवराज खतिवडा आउने अड्कल पनि गरे । केही लगानीकर्ताहरुले भने ब्याज दर घट्दा पनि बजार बढ्न नसकेको तर्क गरे ।  

आज यस वर्षको अन्तिम कारोबार पनि चल्दै थियो । ब्रोकरहाउसहरुमा लगानीकर्ताहरुमा खासै उत्साह देखिदैनथ्यो । यहाँबाट हामी भिजन सेक्यूरिटिज (स्टक ब्रोकर नम्बर ३४) मा पुग्यौं । यहाँ पनि लगानीकर्ताको उपस्थिती ठीकै देखिन्थ्यो । लगानीकर्ताहरु डिस्प्लेमा बजार हेर्न मस्त देखिन्थे । यहाँ भेटिएका  केही लगानीकर्ताहरुले एचआइडीसीएल कम्पनीको चर्चा गरे । केहीले भने आज चैत्रको अन्तिम कारोबार भएकै कारण बजार बढ्न नसकेको बताए ।  

यहाँबाट हामी नजिकै रहेको आर्यतारा सेक्यूरितिज स्टक ब्रोकर नम्बर ५७ मा पुग्यौं । यहाँ पनि लगानीकर्ताहरुको उपस्थिति ठीकै थियो । यहाँ भेटिएका केही लगानीकर्ताहरुले आज ठूला ब्रोकरहरुले हिसाब मिलाउन भए पनि  फोर्स सेलिङ गरेका कारण बजारले गति लिन नसकेको तर्क गरे । केहीले भने नयाँ बर्षबाट बजारले नयाँ उचाई लिन भन्दै शुभकामना आदानप्रदान गरे ।