तेलको मूल्य घट्यो, प्रतिब्यारेल कति पुग्यो ?

काठमाण्डौ । अन्तर्राष्ट्रिय बजारमा मंगलबार कच्चा तेलको मूल्य घटेको छ। अघिल्लो दिनको तीव्र वृद्धिपछि बजारमा पुनः गिरावट देखिएको हो। अमेरिकी र इरानबीच शान्ति वार्ता हुने सम्भावनाले मध्यपूर्वबाट आपूर्ति सहज हुन सक्ने अपेक्षाले मूल्यमा दबाब परेको विश्लेषकहरूले बताएका छन्।

ब्रेन्ट क्रुडको मूल्य ०.६ प्रतिशतले घट्दै प्रतिब्यारेल ९४.९४ अमेरिकी डलरमा झरेको छ। त्यस्तै, डब्लुटीआई क्रुडको मूल्य पनि १.२ प्रतिशतले घटेर प्रतिब्यारेल ८८.५० डलरमा सीमित बनेको छ।  

सोमबार भने बजारमा तीव्र वृद्धि देखिएको थियो। इरानसँग सम्बन्धित आपूर्ति अवरोध र क्षेत्रीय तनावका कारण ब्रेन्ट ५.६ प्रतिशत र डब्लुटीआई ६.९ प्रतिशतले बढेको थियो।

विशेषगरी, मध्यपूर्वको महत्वपूर्ण तेल ढुवानी मार्ग स्ट्रेट अफ हर्मुज वरपर देखिएको अवरोधले बजारमा चिन्ता थपेको छ। यस मार्गबाट विश्वको करिब पाँचौँ भाग कच्चा तेल ढुवानी हुने गर्दछ।

यद्यपि, बजारमा अहिले अमेरिका–इरानबीच सम्भावित वार्ता र युद्धविराम विस्तार हुने आशाले आपूर्ति सहज हुने अपेक्षा बलियो बन्दै गएको छ। केही विश्लेषकहरूले भने अझै पनि आपूर्ति जोखिमलाई बजारले कम आँकलन गरिरहेको चेतावनी दिएका छन्।

अन्तर्राष्ट्रिय ऊर्जा विश्लेषक संस्थाहरूका अनुसार यदि ढुवानी अवरोध लामो समयसम्म जारी रह्यो भने तेलको मूल्य उल्लेख्य रूपमा बढ्न सक्ने सम्भावना छ।