ओखलढुंगामा गोली चलेको हल्ला भ्रामक : प्रहरी

ओखलढुंगामा मतदानका क्रममा गोली चलेको र मानिस घाइते भएको भन्दै सामाजिक सञ्जालमा फैलिएको भिडियो तथा समाचार भ्रामक रहेको प्रहरीले जनाएको छ।

जिल्ला प्रहरी कार्यालयले सामाजिक सञ्जालमा प्रसारित उक्त सूचनाको खण्डन गर्दै ओखलढुंगामा शान्तिपूर्ण रूपमा मतदान भइरहेको स्पष्ट पारेको हो।

डीएसपी मदन केसीका अनुसार फेसबुकमार्फत फैलाइएको झडप र सेनाले गोली चलाएको भन्ने सामग्री पूर्ण रूपमा झुटो हो। “ओखलढुंगामा मतदान शान्तिपूर्ण रूपमा भइरहेको छ,” उनले भने।

प्रहरीले गलत अफवाह फैलाएर सर्वसाधारणमा त्रास सिर्जना गर्ने व्यक्तिहरूको पहिचान र खोजी भइरहेको जनाएको छ। यस्ता भ्रामक सूचना फैलाउनेमाथि कानुनअनुसार कारबाही गरिने चेतावनी पनि प्रहरीले दिएको छ।