कोदारीमा सडक भासिँदा तातोपानी नाका पुनः अवरुद्ध

काठमाण्डौ । अरनिको राजमार्गअन्तर्गत सिन्धुपाल्चोकको कोदारी क्षेत्रमा सडक भासिएपछि नेपाल–चीन जोड्ने प्रमुख व्यापारिक नाका तातोपानी पुनः अवरुद्ध भएको छ।

भोटेकोसी गाउँपालिका–२ स्थित कोदारीको इको क्षेत्रमा करिब दुई मिटर सडक भासिएपछि सोमबारदेखि सवारी आवागमन ठप्प भएको हो।

आइतबार साँझदेखि परेको अविरल वर्षाका कारण सडक भासिएको हो। निरन्तर वर्षा भइरहेका कारण माथिबाट लेदो बगिरहेकाले अवरुद्ध सडक खुलाउने काममा समेत कठिनाइ भइरहेको प्रहरीले जनाएको छ।

सडक खुलाउन चरिकोट सडक डिभिजन कार्यालयले भासिएको स्थानमा गिट्टी र माटो हाल्ने तयारी गरे पनि प्रतिकूल मौसमका कारण काम प्रभावित भएको छ।