(2).gif)
.jfif)
.png)
काठमाण्डौ । अमेरिकी राष्ट्रपति डोनाल्ड ट्रम्पले मध्यपूर्वमा बढ्दो तनावलाई नियन्त्रणमा राख्न इजरायल र इरानलाई तत्काल सैन्य आक्रमण तथा गोलीबारी रोक्न आग्रह गरेका छन्।
उनले आफ्नो सामाजिक सञ्जाल ‘ट्रुथ सोसल’ मार्फत दुवै देशलाई संयमता अपनाएर शान्ति प्रक्रियालाई प्राथमिकता दिन आह्वान गरेका हुन्।
ट्रम्पको यो प्रतिक्रिया इरानले इजरायलमाथि मिसाइल प्रहार गरेपछि आएको हो।
अमेरिकी सञ्चारमाध्यमहरूको रिपोर्टअनुसार ट्रम्पले इजरायली प्रधानमन्त्री बेन्जामिन नेतन्याहूसँग टेलिफोन संवाद गर्दै इरानको आक्रमणको प्रतिकारमा थप सैन्य कारबाही नगर्न आग्रह गरेका थिए।
उनका अनुसार प्रतिशोधात्मक आक्रमणले विगत तीन महिनादेखि जारी शान्ति वार्तालाई प्रभावित पार्न सक्छ।
अमेरिकी सञ्चारमाध्यम ‘एक्सियोस’का अनुसार ट्रम्पले इरानलाई पनि वार्ताको टेबलमा फर्किन र कूटनीतिक समाधान खोज्न आग्रह गरेका छन्।
उनले दुवै पक्ष शान्ति सम्झौताको निकै नजिक पुगेको दाबी गर्दै केही दिनभित्रै सम्झौतामा हस्ताक्षर हुन सक्ने विश्वास व्यक्त गरेका छन्।
फक्स न्युजसँगको अन्तर्वार्तामा ट्रम्पले शान्ति प्रक्रियामा सकारात्मक प्रगति भएको उल्लेख गर्दै इरानलाई थप तनाव नबढाउन आग्रह गरे।
उनले मिसाइल आक्रमणपछि पनि ठूलो क्षति नभएको दाबी गर्दै इजरायलले संयमता अपनाउने अपेक्षा व्यक्त गरे।
ट्रम्पले यदि इजरायलले पुनः जवाफी आक्रमण गरे हिंसाको चक्र निरन्तर चलिरहने चेतावनीसमेत दिएका छन्।
उनले अमेरिका र इरानबीच हुने सम्भावित सम्झौताप्रति इजरायलले पनि सहमति जनाउनुपर्ने धारणा राखेका छन्।
यसैबीच, ट्रम्पले लेबनानको राजधानी बेरुतमा इजरायलले गरेको आक्रमणप्रति असन्तुष्टि जनाएका छन्।
उनले शान्ति सम्झौता नजिक पुगेको अवस्थामा थप सैन्य गतिविधिले परिस्थिति जटिल बनाउन सक्ने भन्दै केही समय धैर्य गर्न नेतन्याहूलाई सुझाव दिएको बताइएको छ।
मध्यपूर्वमा पछिल्ला दिनहरूमा बढेको तनावबीच ट्रम्पको यो अभिव्यक्ति क्षेत्रीय शान्ति प्रयासलाई अघि बढाउने कूटनीतिक पहलका रूपमा हेरिएको छ।
.png)
.jpg)
.jpg)
.jpg)
