फिफा विश्वकपमा ‘फिक्सिङ’ भएको इजिप्टका स्टार खेलाडीको गम्भीर आरोप

काठमाण्डौ । फिफा विश्वकपको राउन्ड अफ १६ मा डिफेन्डिङ च्याम्पियन अर्जेन्टिनासँग ३–२ को नमिठो हार व्यहोरेपछि इजिप्टका फरवार्ड मोस्तफा जिकोले खेलका अधिकारीमाथि कडा आलोचना गरेका छन्। उनले रेफ्रीको निर्णय निष्पक्ष नभएको आरोप लगाउँदै प्रतियोगिताको निष्पक्षतामाथि नै प्रश्न उठाएका छन्।

इजिप्टले अर्जेन्टिनाविरुद्ध ऐतिहासिक जिततर्फ अग्रसर हुँदै खेलको ६७औँ मिनेटसम्म २–० को अग्रता बनाएको थियो। तर तीन पटकको विश्व विजेता अर्जेन्टिनाले उत्कृष्ट पुनरागमन गर्दै क्रिस्टियन रोमेरो, लियोनल मेस्सी र एन्जो फर्नान्डेजको गोलमार्फत १३ मिनेटको अवधिमा खेल उल्ट्याउँदै ३–२ को जित निकालेको हो।

खेलको निर्णायक क्षणमध्ये एक दोस्रो हाफको सुरुवातमै आयो, जब जिकोले गरेको गोललाई भिडियो असिस्टेन्ट रेफ्री (भीएआर) को समीक्षापछि रद्द गरिएको थियो। अधिकारीहरूले गोल हुनुअघि जिकोबाट फाउल भएको निष्कर्ष निकालेका थिए। यद्यपि जिकोले पछि गोल गर्दै इजिप्टको अग्रता २–० पुर्याएका थिए, रद्द गरिएको गोल खेलको महत्वपूर्ण मोड बनेको थियो।

खेलपछि सञ्चारकर्मीसँग कुरा गर्दै भावुक देखिएका जिकोले रेफ्रीको निर्णयप्रति असन्तुष्टि व्यक्त गरे।

‘यो निष्पक्ष भएन। रेफ्रीको निर्णयमा स्पष्ट अन्याय भयो। उनले एउटा देशको मेहनत खेर फाले। सुरुदेखि नै निर्णयहरू हाम्रो विपक्षमा थिए। हामीले अर्जेन्टिनाविरुद्ध २–० को जित निकाल्नु सम्भव छैन भन्ने जस्तो व्यवहार भयो,’ जिकोले भने।

उनले प्रतियोगिताको निष्पक्षतामाथि समेत प्रश्न उठाउँदै भने, “यो प्रतियोगिता ‘फिक्सिङ’ गरिएको जस्तो देखिन्छ।’

जिकोले समर्थकसँग माफी माग्दै खेलाडीहरूले आफ्नो तर्फबाट पूर्ण प्रयास गरेको बताए। ‘हामी आज समर्थकलाई खुसी बनाउन चाहन्थ्यौं। हामी असफल भयौं, तर यो हाम्रो हातमा थिएन। सबै कुरा रेफ्रीको हातमा थियो,’ उनले भने।

खेलमा इजिप्टले उत्कृष्ट सुरुवात गरेको थियो। १५औँ मिनेटमा मारवान अतियाको कर्नरमा यासेर इब्राहिमले हेडरमार्फत गोल गर्दै टोलीलाई अग्रता दिलाएका थिए। त्यसपछि अर्जेन्टिनाले बराबरी गर्ने अवसर पाएको थियो, तर निकोलस टाग्लियाफिकोले जितेको पेनाल्टीमा लियोनल मेस्सीको प्रहार इजिप्टका गोलरक्षक मोस्तफा शोबेरले उत्कृष्ट बचाउ गरे।

शोबेरले खेलभर अर्जेन्टिनाका धेरै आक्रमण असफल बनाए। उनले एलेक्सिस म्याक एलिस्टर र जुलियन अल्भारेजका प्रहार रोके भने मेस्सीको फ्रिकिक पनि क्रसबारमा लागेको थियो। पहिलो हाफको अन्त्यसम्म इजिप्ट १–० ले अघि थियो।

दोस्रो हाफमा जिकोको गोल भीएआरबाट रद्द भए पनि इजिप्टले दबाब कायम राख्यो। ६७औँ मिनेटमा मोहम्मद सलाह र हाइसेम हसनको संयोजनमा जिकोले गोल गर्दै इजिप्टको अग्रता २–० पुर्याए।

तर अर्जेन्टिनाले त्यसपछि शानदार पुनरागमन गर्यो। ७९औँ मिनेटमा मेस्सीको फ्रिकिकमा रोमेरोले हेडर गोल गर्दै अन्तर घटाए। त्यसको चार मिनेटपछि मेस्सीले शक्तिशाली प्रहारमार्फत बराबरी गोल गरे।

निर्धारित समय सकिनै लाग्दा एन्जो फर्नान्डेजले अतिरिक्त समयको इन्जुरी समयमा निर्णायक गोल गर्दै अर्जेन्टिनालाई ३–२ को जित दिलाए।

यो जितसँगै अर्जेन्टिना विश्वकपको क्वार्टरफाइनलमा प्रवेश गरेको छ। अब उसले स्विट्जरल्यान्डसँग प्रतिस्पर्धा गर्नेछ।